XA TEMOS GAÑADOR

Hoxe pola mañá entregamos o ordenador portátil a Iago Martínez, posuidor do boleto co número 1237. Entregámoslle o premio na planta baixa do colexio en presenza do neno que lla vendeu, Pablo de 6º. Noraboa.

NÚMERO PREMIADO NO SORTEO DO PORTÁTIL

No sorteo celebrado na mañá de hoxe, o numero premiado foi o 1237. O interesado/a debe presentar o boleto antes das 9:00 horas do luns día 22 de xuño. Noraboa.

ENQUISAS SOBRE A LINGUA GALEGA

A Federación de ANPAS da provincia de Pontevedra na súa páxina web informa sobre a enquisa que as familias de Galicia están recibindo estes días relativa á presenza da nosa lingua no ensino non universitario. Na web amósase un tríptico sobre a lingua galega elaborado por moitos equipos de normalización lingüística de centros de ensino de Galicia así como a Circular 89/09 de CONFAPA Galicia (que aglutina a 600 ANPAS de centros públicos de Galicia) dirixida a todas as ANPAS e a todos os pais e nais.

SAÍDA FIN DE CURSO

O alumnado de Terceiro Ciclo participará na saída fin de curso que se celebrará na "Granja Escuela El Kiriko" entre o luns 15 e o mércores 17. Alí, ademais de pasalo moi ben, realizarán diversas actividades de coñecemento da natureza, o ciclo da auga, o ciclo da la, etc.

NOVO SORTEO DO PORTÁTIL

No caso de que non apareza o agrazado/a no sorteo celebrado o día 2 de xuño, antes das 14 horas do día 17, farase un novo sorteo o xoves, día 18 ás 9:05 horas da mañá, na planta baixa do colexio. O sorteo será público.

OBRADOIRO DE ANIMACIÓN

Os días 4 e 5 de xuño, dous monitores (Jorge e Juan) do Consorcio Audiovisual de Galicia viñeron ao colexio para realizar un Obradoiro de Animación co alumnado de 4º, 5º e 6º. É unha das actividades que se realiza dentro do programa Audiovisual nas aulas, no que entrou este curso o colexio.

Entre todos/as fixeron unha parte dunha curtametraxe que se completará en colaboración cos outros centros participantes na experiencia. Esta película pretende fomentar a doazón de órganos.

Debuxaron os decorados en papel, pasáronos a cartoliña, recortáronos e fixeron a animación tomando imaxes e movendo pouco a pouco os personaxes.

É moi fácil!

SORTEO DO PORTÁTIL

Na tarde de hoxe celebrouse na planta baixa do colexio o sorteo do ordenador portátil. O número que resultou agraciado é o 0391.

O posuidor/a do boleto ten quince días para reclamar o seu premio. Noraboa!

NO DÍA DAS NOSAS LETRAS

Esta semana celebramos no Edificio Multiusos de Redondela os Festivais de Infantil e Primaria. Vimos as actuacións do alumnado preparadas polo profesorado e tamén unha mostra do bo facer das monitoras das actividades extraescolares.

Coñecimos tamén, a través das imaxes e textos elaborados polos maiores, un pouco da vida de Ramón Piñeiro, figura clave do galeguismo no século XX.

Precisamente na véspera da data que lembra dun xeito especial ao noso idioma milenario, achegamos aquí un enlace no que a Real Academia Galega, institución creada en 1906 baixo a presidencia de Manuel Murguía, home de Rosalía de Castro, analiza a actual conxuntura arredor da nosa lingua.

E tamén achegamos un vídeo do que a coñecida presentadora do programa da Galega "O país dos pequenos", Belén Regueira, comentou cando recibíu o premio Mestre Mateo á mellor comunicadora do ano.

Que as dúas testemuñas nos permitan reflexionar sobre a importancia de coñecer a nosa lingua e moitas máis.

DÍA DO LIBRO

O pasado 23 de abril celebramos o día do Libro no colexio.
O día anterior visitaranos Chus Pereiro, que nos veu falar da súa obra ¡Mama- siña, que medo!
Esta obra vai ser represen- tada polos rapaces/as do obradoiro de teatro do colexio nos festivais das Letras Galegas dos días 15 e 16 de maio.

O día 23 fixemos dous actos adicados ao teatro. Neles os nenos e nenas fixeron pequenas representacións das cales vos ofrecemos varias imaxes.

A SEMANA DO LIBRO

Comezamos unha semana especial: a semana do libro. O xoves día 23 de abril realizaremos varios actos no colexio para lembrar esta data. Neste ano adicaremos os mesmos ao teatro. Primeiro o alumnado de Educación Infantil e máis tarde o alumnado de Primaria pasarán pola Biblioteca para realizar pequenas escenificacións, teatro lido, etc. Farase unha exposición de libros de teatro e tamén haberá actividades especiais organizadas polas mestras encargadas da Biblioteca.
O mércores 22 recibiremos no colexio á autora da obra teatral (Mamasiña, que medo!) que o alumnado do Obradoiro de Teatro vai representar no Festival das Letras Galegas: Chus Pereiro. Estará cos nenos e nenas de 4º, 5º e 6º.
Felices lecturas para todas e todos!

CAMPAMENTOS DA LANZADA 2009

A Deputación Provincial de Pontevedra convoca os Campamentos da Lanzada 2009 para nenos/as nados entre 1996 e 2001. As bases e follas de solicitude e inscrición aparecen na páxina da Deputación. Para máis información podédesvos dirixir ao Concello (servizos sociais) e ler atentamente as bases que aparecen na páxina web.

VIAXES REAIS E VIRTUAIS

Nestes días de lecer podemos aproveitar para facer viaxes reais ou virtuais. Dentro das primeiras temos infinidade de lugares que percorrer, ben lonxe ou moi perto de nós.

Nesta páxina de TURGALICIA podedes descargar moitos folletos de gran calidade sobre roteiros, monumentos, sendeiros, arte, gastronomía,... Todo o que vos fai falta saber para saír de casa informados sobre os distintos destinos en Galicia.

Tamén podemos facer viaxes virtuais polos distintos recunchos do mundo. Unha páxina moi interesante para percorrer os monumentos máis importantes de España, Latinoamérica e Marrocos é ARS VIRTUAL. Facendo clic en Mapa do Patrimonio ou no Patrimonio das distintas zonas accederemos a moitas visitas que nos farán aprender e coñecer moitas obras mestras da arte.

Aquí propoñémosvos ver un vídeo sobre a Catedral de Santiago de Compostela. Saberedes tamén que non foi sempre como agora a vemos, senón que baixo a cuberta barroca, hai unha fermosa catedral románica. Este vídeo procede dunha páxina moi completa, ARTEHISTORIA. Facendo clic nela ou neste enlace, teredes moitísima información e imaxes de gran calidade sobre o que é un dos monumentos máis importantes da península Ibérica e, por suposto, o máis visitado de Galicia.

Boas vacacións!!!

NOVO FOTOBLOG: 100% NATURAL

Esta semana presentámosvos outro fotoblog de gran calidade. Trátase de 100% NATURAL, do fotógrafo José B. Ruíz. Indo á seccion Galería, podedes ver unha selección de imaxes espectaculares feitas polo autor.

Nesta sección atoparedes moitas fotografías da natureza clasificadas por temas.

Non vos apetece, se tendes unha cámara a man, saír polo campo a tirar boas fotografías nas vindeiras vacacións?

FOTOBLOGS DE NATUREZA

Hoxe principiamos unha nova sección: os blogs de fotografías da natureza. Ao longo de varias semanas iremos coñecendo o excepcional traballo fotográfico de moitas persoas que teñen a xenerosidade de plasmalo en fermosas páxinas web para goce de todos/as nós.

E para comezar, un dos mellores: GONATURE.ES, do sevillano Diego López. Acompañados da música que aparece na páxina podédesvos relaxar contemplando as galerías fotográficas de aves, paisaxes, texturas e formas, mamíferos, etc.

ACTIVIDADES PARA A SEMANA

Esta semana teremos moitas actividades. O martes, o alumnado de 3º ciclo participará nunha nova xornada do Deporte na escola. Será no Pavillón de Chapela.

Entre o mércores e o xoves os nenos/as de Infantil 4 e 5 anos, e os de 1º, 2º e 3º de Primaria visitarán o Xardín Arboretum Caixa Galicia, sito en Samil (Vigo). Se facedes clic no enlace anterior poderedes descargar un arquivo con fotografías de gran beleza.

O mércores o alumnado de 3º, 4º, 5º e 6º asistirá no Edificio Multiusos de Redondela a unha obra de teatro que pretende sensibilizar a todas e todos da importancia de utilizar correctamente os antibióticos.

CAMPAMENTOS DE VERÁN DA XUNTA DE GALICIA

O DOG do 9 de marzo publica a Orde da Vicepresidencia da Igualdade e do Benestar pola que se ofertan prazas de Campamentos de verán para rapaces/as de 9 a 17 anos. O prazo de presentación de solicitudes remata o día 24 de marzo.

Para ter unha completa información facede clic neste enlace para poder descargar un amplo folleto con todos os detalles de campamentos, instalacións, datas, etc.

Toda a información dos campamentos está no DOG (incluidos os impresos de solicitude), no taboleiro de anuncios do colexio e na web www.xuventude.net

Goza dun verán diferente.

SOLICITA A TÚA PRAZA!!!

O DÍA DA MULLER TRABALLADORA

Hoxe, día 8 de marzo, celébrase o Día da Muller Traballadora . Xurdíu xa hai case cen anos para reivindicar algo tan elemental como o dereito a voto, a poder ocupar cargos públicos e o dereito ao traballo e á non discriminación polo mero feito de ser mulleres.
Para que poidades reflexionar un pouco cada un, temos este vídeo que mostra a vida nun fogar ao longo dun día.
É xusto o que alí acontece? Pensa, opina e actúa.

A FLOR MÁIS GRANDE DO MUNDO

Na páxina Flocos.tv tendes moitas películas e documentais de interese, que poden verse ou descargarse no ordenador. Hai un apartado específico para a animación.

Hoxe destacamos unha fermosa historia de José Saramago, A flor máis grande do mundo.

Trátase dunha curtametraxe de animación con moita mensaxe.

Sodes capaces de adiviñala?

ENTROIDO 2009

O venres día 20 celebramos o Entroido no colexio. Fixémolo cun desfile ata o Cruceiro. Participou todo o alumnado e o profesorado do centro. O tema central foi o dos Xogos de Mesa. Así, Educación Infantil representou ao Parchis (cada clase ía de fichas dunha cor). O primeiro ciclo de Primaria foi de Cartas; o segundo de Dominó, e os máis maiores de Xadrez.

Na cabeza do desfile, trala megafonía, ía o Meco, baixo o lema “Pinchou co ladrillo”, representando ao período de crise que atravesa o mundo na actualidade.

Xa de volta no colexio, cada aula pinchou un globo con aquilo que desexaba que desaparecera da Terra: os malos tratos, a fame, as guerras,…

E finalmente condenouse o Meco (a crise) a ser queimado e desaparecer para sempre.

Ao facer clic na imaxe inferior, podes ver algunhas fotos da festa.

Fotos entroido 2009

CHEGA O ENTROIDO

Nestes días de Entroido podedes coñecer máis sobre esta celebración. Nesta páxina da Consellería de Educación tendes un especial sobre o Entroido, non só en Galicia, senon tamén en España e no mundo.

Se vedes a televisión e vos gustan os documentais, hai dúas propostas de interese:

O sábado na Galega emítese ás 21:15 horas o primeiro episodio de Galicia Salvaxe. Un programa para tomar conciencia do medio natural que temos máis próximo.

E o domingo pola mañá, ás 13:30 horas , La 1 de TVE emite un novo programa de Planeta Tierra, unha gran produción da BBC británica que conta con imaxes de gran calidade e moita espectacularidade.
Podedes ver un vídeo promocional da mesma premendo aquí.

E para os siareiros do deporte, gran fin de semana coa Copa do Rei de baloncesto, emitida íntegramente por La 2 e Teledeporte.

PREPARANDO O ENTROIDO

O venres día 20 celebraremos o Entroido no colexio. Farémolo, se todo sae como está previsto, cun desfile que comezará arredor das 12:30 horas e que irá do colexio ata as inmediacións do Cruceiro. Nel participará todo o alumnado.

Este ano recuperaremos a figura do Meco, que tamén participará no desfile.
Ata o venres seguiremos preparando os disfraces.

AULAS DA NATUREZA EN CANTABRIA

No DOG de hoxe publícase a a Orde do 19 de xaneiro de 2009 pola que se convocan axudas para participar no programa de integración Aulas da Natureza 2009. Vai dirixido ao alumnado de Galicia que teña entre 11 e 13 anos de idade no momento de asistencia á actividade (no vindeiro verán).

Terán lugar no centro de programas educativos de Viérnoles, en Torrelavega (Cantabria) e realizarase en quendas de 12 días.
Ata o día 13 de marzo está aberto o prazo para solicitalas.

Para máis información poden entrar no DOG ou dirixirse á Secretaría do Colexio.

80 ANIVERSARIO DA LIGA ESPAÑOLA DE FÚTBOL

Hoxe a Liga de Fútbol cumpre 80 anos. Un 10 de febreiro de 1929 arrincou un campionato que ao longo dos anos gañou o interese de milleiros de persoas. A continuación tendes vídeos sobre a liga, e varios enlaces no que se ofrece información sobre os primeiros campionatos.

Vídeo 1
Vídeo 2
Artigo 1
Artigo 2 con xornais da época

AUDIOVISUAL NAS AULAS NO CEIP DE CEDEIRA

O programa Audiovisual nas aulas leva funcionando en Galicia dende o curso 2003-2004. Con carácter de experiencia pioneira no conxunto do estado español, e promovido pola Consellería de Educación e Ordenación Universitaria, o Consorcio Audiovisual de Galicia e a Secretaría Xeral de Comunicación, naceu o programa Audiovisual nas Aulas. Comezou coa finalidade de que os centros de ensino non universitario de Galicia puideran iniciarse e introducir no currículo escolar contidos relacionados co audiovisual, coa animación, coa televisión e novas tecnoloxías.

Os obxectivos do programa son:

• Dotar ao alumnado dunha alfabetización audiovisual básica.

• Fomentar o espírito crítico ante o audiovisual.
• Potenciar o coñecemento do audiovisual galego.
• Achegar ao alumnado aos creadores e artífices do audiovisual galego.
No presente curso foi concedido ao noso colexio. Aprenderemos de xeito práctico como se realiza unha animación a través dun obradoiro.

NACE A GALEGA-2

Esta semana comezou a emitir de xeito oficial a segunda canle da galega, a G-2. Ten dúas franxas de programación infantil, unha á hora de xantar e outra arredor das seis da tarde. Neste enlace podedes ver o vídeo promocional desta nova canle que só se pode ver a través do TDT.

PARTICIPANDO EN DEPORTE NA ESCOLA

Ata o momento levamos dúas xornadas de competición. Na primeira visitamos ao colexio Santiago Apóstol do concello de Soutomaior. Na segunda, celebrada onte, martes, viaxamos ata o veciño concello de Pazos de Borbén para coñecer novos amigos/as do Colexio Publico Integrado "Curros Enríquez".
Tendes aquí algunhas imaxes destes encontros.

CELEBRAMOS O DÍA DA PAZ

O 30 de xaneiro celebramos o "Día escolar pola paz e a non violencia". Nas aulas preparamos unha serie de pombas para colocalas nas árbores do patio, mais debido ás condicións meteoro- lóxicas, colgamos case todas nos corredores. Fixemos murais e escribimos lemas.
O Obradoiro de Radio montou un programa de radio que podedes escoitar no reproductor que tendes na columna da dereita deste blog.
A última hora fixemos un acto colectivo no que limos poemas e mensaxes pola paz, rematando con dúas cantigas ("No dudaría", de Rosario Flores e "Que canten los niños" de José Luis Perales).
Tendes aquí varias fotos das actividades. No Festival das Letras poderedes ver en pantalla grande unha proxección con todas.

NOVA VERSIÓN DE GOOGLE EARTH NA QUE SE MOSTRAN OS OCÉANOS

Xa se pode descargar a nova versión de Google Earth que permite levar a cabo viaxes submariñas virtuais, así como investigar os mares mediante fotos e numerosos videos.

Si xa era un programa moi interesante,esta incorporación xunto á posibilidade de ver obras de arte cun detalle moito maior que na propia realidade (por exemplo, no Museo do Prado) e a visita virtual a varias cidades (mediante a capa Street View) fan que Google Earth sexa unha boa ferramenta de aprendizaxe para todos/as.

VÍDEOS DE XEOGRAFÍA GALEGA

Hoxe presentámosvos unha páxina web na que podedes ver vídeos e documentais de interese. Trátase de CULTURAGALEGA.ORG/TV na que, entre outros, están unha serie de programas emitidos pola Galega e pertencentes á serie Xeografía de Galicia. Nun dos mesmos percórrense as Rías Baixas, concretamente as de Pontevedra e Vigo.

GALINUX

Xa temos Linux en galego. O popular sistema operativo, de balde e en galego. Na páxina http://galinux.mancomun.org pódese descargar ou consultar os puntos de distribución gratuita. No listado aparece Redondela, no centro da Rede de Dinamización, con sede no Edificio Multiusos.

Non son precisos coñecementos técnicos especiais para poder beneficiarse das vantaxes básicas do Galinux, pois inclúe automaticamente os programas informáticos máis empregados: para navegar pola Internet, acceder ao correo electrónico, escoitar música, escribir documentos de texto, facer gráficas e cálculos, ver vídeos ou películas, compartir ficheiros, conversar por mensaxería instantánea e moito máis.

O DOMINGO COMEZA O X SALÓN DO LIBRO EN PONTEVEDRA

Do 1 de febreiro ao 15 de marzo de 2009

O amor é o tema que centra este ano o Salón do Libro Infantil e Xuvenil de Pontevedra, no que Portugal será o país convidado.

Exposicións, conferencias, actividades concertadas, concertos e literatura, moita literatura enriquecen o programa desta X edición que amplía a súa duración do 1 de febreiro ao 15 de marzo. A escritora Fina Casalderrey será a autora homenaxeada este ano.

A súa visita é moi recomendable. Pódese consultar o programa completo de actividades na páxina web www.salondolibro.org

ENTREGA DA BICICLETA

Onte pola tarde foi entregada a bicicleta que se sorteou o día 16 de xaneiro.

Na foto podedes ver ao afortunado que a gañou.. Trátase de Miguel, un alumno do colexio de quinto curso.
NORABOA!!!

NOVO PROGRAMA MUSICAL NA GALEGA

A Televisión de Galicia estreará na tarde do sábado 31 de xaneiro “BANDA CURTA”, un novo programa musical que terá como característica principal as actuacións de grupos en directo e ante público. O programa de unha hora de duración , comezará ás catro da tarde. “BANDA CURTA” nace con vocación de dar a coñecer o amplo panorama da música pop e rock en Galicia, os grupos emerxentes ou as bandas que usan da rede de locais de ensaio. Ademais de música en directo, en “BANDA CURTA” haberá reportaxes e entrevistas sobre todos os estilos musicais, as novidades do mercado ou a axenda de concertos.

A NOSA MÚSICA DE SAÍDA: LUAR NA LUBRE

Sabíades quen interpreta a música que escoitamos ás dúas da tarde, cando marchamos para casa? Un grupo galego chamado Luar na Lubre. Se queres ver un fermoso vídeo coa música de "O son do ar" fai clic nel. Tamén podes visitar a súa páxina web www.luarnalubre.com, ou a súa canle en Youtube

O CASTRO DE SANTA TEGRA

CURSOS DE GALEGO

O DOG de hoxe, 22 de xaneiro, publica a Orde da Consellería de Educación e O. U. do 12 de xaneiro de 2009 pola que se convocan, en colaboración coa Secretaría Xeral de Política Lingüística, cursos preparatorios ás probas para acadar os certificados de lingua galega, Celga, nos niveis 1, 2 e 3 para o ano 2009, que se realizarán nas escolas oficiais de idiomas de Galicia no ano 2009.

Os cursos impartiranse en dúas quendas: a primeira comezará en febreiro e a segunda en outubro de 2009, en horario de mañá ou de tarde, segundo a dispoñibilidade de aulas. Terán unha duración de 60 horas lectivas e serán de balde.
Os cursos van dirixidos a todas as persoas maiores de dezaseis anos.
Solicitudes e prazos.
As solicitudes, segundo o modelo que figura no anexo I desta orde, poderanse presentar na propia escola oficial de idiomas onde teña lugar o curso a partir do día seguinte ao da publicación desta orde e ata cinco días antes da data establecida por cada escola oficial de idiomas para o inicio do curso.

Para máis información poden consultar o DOG de hoxe ou dirixirse á secretaría do Colexio.

INMERSIÓN LINGÜÍSTICA EN INGLÉS

A Consellería de Educación e Ordenación Universitaria convoca 2.650 prazas para realizar actividades de inmersión lingüística no verán de 2009.

Pode solicitar estas axudas o alumnado de centros sostidos con fondos públicos da Comunidade Autónoma Galega que non gozase dunha bolsa de inmersión 2008.
Para 6º de Educación Primaria hai 100 prazas. Os campamentos serán na comunidade autónoma de Galicia, cunha duración de dúas semanas. Cada familia terá que abonar 75€.
A solicitude faise a través da páxina web http://www.edu.xunta.es/axudasle O prazo remata o día 9 de febreiro.
Para máis información pódese visitar a páxina arriba mencionada ou ben preguntar na secretaría do colexio.

SORTEO DA BICICLETA

Xa sabemos o número ao que lle tocou a bicicleta. É o 935, posto que son as tres derradeiras cifras do número premiado no sorteo da ONCE do pasado venres, día 16 de xaneiro.

O posuidor ou posuidora do boleto premiado ten 15 días contados a partir desa data para presentalo no colexio e levar a súa bicicleta.
Noraboa ao afortunado/a.

ESTAMOS DE ESTREA

Benvidas e benvidos ao novo blog do CEIP de Cedeira. Nel incluiremos novas sobre as actividades do colexio. Tamén outros contidos que consideremos de interese para a comunidade educativa. Non esquezades consultar as páxinas web recomendadas.

Agardamos que sigades con interese as actualizacións do mesmo.

PREPARÁNDONOS PARA O DÍA DA PAZ

O vindeiro 30 de xaneiro celebraremos o Día escolar pola non violencia e a paz, no aniversario da morte de Gandhi. Coma sempre, no colexio faremos diversas actividades para lembrar a importancia que todas e todos temos para contribuir a facer un mundo máis xusto e solidario.

No entanto podémonos preparar visitando a web de Anxo Moure,
CONTOS SOLIDARIOS, e lembrando a visita que realizou ao noso colexio de Cedeira no ano 2003 e que lle inspirou unha das súas historias.





Tamén podemos visitar estoutra páxina na que hai poemas, cantigas e contos pola paz.

DEPORTE NA ESCOLA

O vindeiro venres día 23 principiamos a nosa participación no programa Deporte na Escola (actividade polideportivo cultural). Está organizado polas consellerías de Educación, Cultura e Deporte. Desprazarémonos ata o veciño concello de Soutomaior para pasar un bo rato e coñecer novos amigos/as no colexio Santiago Apóstol. Xogaremos a varios deportes (bádminton, baloncesto, balonmán, fútbol sala, voleibol) ademais de realizar unha proba cultural. Nesta actividade participará o alumnado de 6º de Primaria e varios nenos e nenas de 5º.